WhErE eVeR wE aRe, ThE oNlY pLaCe We CaLl HoMe Is ArAkaN!

Warmly Welcome to Arakan (ဘုရားသာသနာမြီ မောင်ရို.ရခိုင့်ဌာနီ)

ရခိုင်မော်ဒန်ရော့(ခ်) (Arakan Modern Rock)

Friday 19 November 2010

ဂီရိကျိန်စာ (၀တ္ထူတို)

ဂီရိကျိန်စာ (၀တ္ထူတို)

“စွန်လာ သစ်ငုတ်လား၊ သစ်ငုတ်ဆိုထိုင်နိန်၊ စွန်ဆို ထလိုက်၊ ကြက်မမကောင်း ကြက်ချေကောင်း ပိယောင် ပိယောင်၊ ကြက်မ မကောင်း ကြက်ချေ ကောင်းပိယောင်၊ပိယောင်” ………….

အဘုချေတိကစပ်နိန်ကတ်တေ အသံ……. ၀ါကျွတ်လပြည့်ဖို့ယာဖြစ်လို့ နပြင်တိခြောက်၊ နီပူတောက်ဖို့ အားယူလာရေအချိန်၊ ရှစ်ခွင်ဝဠာတိုင်းမှာ မိုးတစ်ပြ နီတစ်ပြနန့်…….။ ဖြူမချေရို့ သူငယ်ချင်းတစ်စု ကကောင်း ကစပ်မက်တေ…….နိန့်စိုင်ရက်ပြတ်၊ ညတိုင်းမချူ ကစပ်ကတ်တေ……

အိမ်ခြီ ၁၅၀ ဟိရေ မြေပုံမြို့နယ်က ဒေ ဂူပေါက် ရွှာချေမှာ အသက်(၁၀)နှစ်အရွှယ် ဖြူမချေနန့် ရွှယ်တူမွီးလာစွာ ကလိန့်မေချေ ၂၀ လောက်ဟိရေ။ အပူအပင် ကင်းရေအရွှယ်..ဘောက်ကတတ်အရွှယ်..လူ့လောကကိုယောင်ဝီယောင်ဝါး မီးခွန်းတိ မီးတတ်ပြီးဂေ မဖြေတတ်တေ အရွှယ်…..ဒေကလိန့်မေချေတစ်စု ဒေရွှာမှာ မွီး၊ ဒေရွှာမှာကြီး၊ ဒေမှာ ကျောင်းတတ်။ (၄)တန်း အစိုးရမှုလတန်းကျောင်းမှာ အခြေပညာသင်နိန်ကတ်တေ…..မိဘတိ အလုပ်စိတ်မ၀င်စား၊ ယေဂေလေ့ ဘာဘာ ရို့ အမင်ရို့ လယ်ယာ၊ကိုင်းကျွန်းအလုပ်တိမှာ အကူအညီရကတ်တေချင့်……..။

“ ဟေ….ဖြူမချေ၊ နရို့တိ နောက်နစ်ဆိုဂေ နားတန်းရောက်ယာနန်း..အယယ်တန်းကျောင်းလားရဖို့၊ ပျော်အောင်းထမန်း” ………..

စကားချေမပီးတပီးနန့် ဖြူမချေကို သူ့ငယ်ချင်းမချေ ဒါချေခိုင် က ကစပ်နိန်ယင်း လှမ်းမီးရေ……..ကကောင်းသနားဖို့ကောင်းရေ အရိပ်တစ်ခု ဖြူမချေ မျက်နှာမှာ ဖြတ်သန်းလားရေ….ထိုတစ်ရက်၊နှစ်ရက်ကသိမ့် နွားကျောင်းနိန်ရေ ဘာဘာကို အမင်နန့် ထမင်းလားပို့ခီခါ ပေါက်ပင်အောက်မှာ မိသားစု စကားလက်ဆုံကျစွာကို ဖြူမချေ သတိရမိလားစွာ။ ………..

“ သမီးချေ…..ဘာဘရို့ကိုကြည့်စမ်” ဆိုပနာ ဘာဘာ စကားစလာစွာ….။ “ သမီးချေ သိရေအတိုင်းယာဝေ….ဘာဘာရို့က ပင်ပန်းဆင်းရဲကတ်တေမလား၊ ဒေ လယ်တစ်ချိုင်းချေနန့် စားဖို့၊ ၀တ်ဖို့ အနိုင်နိုင်ပါဝေ…..ယင်းအတွက်နန့် သမီးချေကို ဒေနှစ် ၄ တန်းအောင်ပြီးကေ ဘာဘာရို့ ကျောင်းမထားနိုင်ယာ…….မြို့မှာ ဈီးက ကြီးနန့် စရိတ်မတတ်နိုင်ပါဝေ……။ သမီးချေ အောက်က မောင်ချေ ၂ ယောက်လေ့ ကြည့်………၊” ……………

ဒါချေခိုင် စကားအပြီးမှာ ငါ ကျောင်းက အဂွင့်ထွက်ရဖို့ယာမလားဂုဆိုရေ အသိတစ်ခု ဖြူမချေ ရင်ဘက်ချေကို ပြီးဆင့်လာရေ…..ဒါချေခိုင်က ရွှာက လူကြီးသမီးဆိုခါ ပြေလေရေ……၄ တန်းအောင်ကေ မြေပုံမြို့မှာ ကျောင်ထားပီးဖို့ အဖသယ်ရေ အဆင်သင့်လုပ်ပြီးသား၊ ဖြုမချေ တစ်ခုလေ့ ပြန်မပြောနိုင်…..ယေဂေလေ့ အချေဘာသာ ယင်းစိတ်ခံစားချက်က ကကောင်းမကြာလိုက် ပျောက်ကွယ်လားရေ…………ကလိန့်မေချေရို့ ကစပ်လက်စပ် ကစပ်လို့ ………

“ ညောင်ပင်တဆီ ဇာကိုင်းမှာ နိန်…..ဇာသီးစား……..ဇာရီသောက်….နင့်မှာ သားသမီး ဇာနှစ်ယောက်ဟိလေ…….”

```````````````````````````````````````````````````````````````
အဂွင့်ဆိုကေ ဒါချေခိုင်ရို့ အဖသယ်ကို ရွှာကလူတိကောင်းကြည့်မရကတ်…..ဖြူမချေ အဖဆိုကေ ပိုဆိုးရေ ….တစ်ခါတစ်လီ ဖြူမချေ အဖ တင်းမဆပ်နိုင်ကေ မြန်မာစစ်သားတိ တကားကားနန့် ဒါချေခိုင်အဖ တစ်ယောက် ဖြူမချေ ရို့အိမ်ကို လာပနာ ရာဇသံပီးတတ်တေ…….. ကြည့်မရကေလေ့ ဒါချေခိုင်ရို့အိမ်သားတိကို ရွှာသားတိ အင့်ပနာ နမ်းနိန်ရရေအဖြစ်……မဟုတ်ကေ အနိုင်ကျင့်ခံရနိုင်ရေ…….

ဒေနှစ်တိမှာ ရာသီဥတုတိ ဖောက်ပြန်ကတ်တေ။ မိုးကျစွာ နောက်ကျရေ ….. လယ်မြီတိကလေ့ ကုန်းထက်ဖက်ကျကေ မြီသြဇာ မကောင်းကတ်……မြီဆီဝယ်ထည့်ရရေ ဘင်္ဂလာကလာရေ မြီဆီတိက ဈီးကြီးရေ ..ဖြူမချေရို့အဖဆိုကေ စပါးအထွက်ကောင်းဖို့အတွက် မြီသြဇာဝယ်ဖို့ ဒင်္ဂါးမဟိလို့ တင်းချီးရရေ….မဆပ်နိုင်ကေ တစ်ခါတစ်လီ ၀မ်းစာလောင်ထားရေ စပါးတိကိုပါ အစိုးရကို ချပီးရရေ ဘ၀မျိုး…….

ယင်းပိုင်နန့် ဒေရွှာက လူသားတိုင်းရေ ၀မ်းရီးကို လောကဒဏ်က ဖန်တီးရေ အတိုင်း ကြကြံ့ခံဗျာယ် ဘ၀ တစ်ခုအတွက် ရုန်းကန် အသက်ရှင်လာကတ်စွာ ရာစုနှစ်တိကုန်ဖို့ယာ……

``````````````````````````````````````````````````````````````
ဝါကျွတ်လပြည့်ဖို့ ပါးပါလတ်ယာ…..ရွှာက လူပျိူချေ အပျိူရို့ တစ်ပြုံးပြုံးနန့် …..ရွှာကို လှည့်ပနာ တောင်းတိနန့် ဆန်အလှူခံနိန်ကတ်တေ…..ဒိုင်းအိုးထိုးပနာ ဘုန်းကြီးကျောင်းမှာ လားလှူကတ်ဖို့လို့….လူပျိုချေ အပျိုရို့ နောက်မှာ ထုံးစိုင်အတိုင်း ဖြူမချေရို့ ဒါချေခိုင်ရို့အဖွဲ့ တန်းလိုက်ပါကတ်တေ……..ဒေချင့်ရွှာ အလှတစ်ခု…….ယေဒါလေ့ ဒေနှစ်လူတိ စိတ်မသာမယာ မျက်နှာချေတိနန့် ……… အလှူအတန်းပေါများခရေ ဒေရွှာတိက လူတိရေ တစစ ပြောင်းလဲလာစွာ သတိထားမိရေ….အယင်ခါပိုင် မဟုတ်.ယာ…..၀မ်းစာထမင်း တစ်နှစ်စာ အနိုင်နိုင် စုနိန်ရရေ ဘ၀မှာ ဆန်တစ်တောင်း အစား တစ်သစ် လှူနိုင်ကတ်ယာ…….။ ဘ၀ ရည်မှန်းချက် အာမခံချက်ဆိုစွာလေ့ ဝေလီဝေလင်း မမြင်ရ အလှပလ…….လောလောဆယ် အသက်ရှင်ဖို့အရေးကြီးရေ….

ဇာပိုင်ပင်ကြမ်းတမ်းလီဘတ်စီ ကိုယ့်ရိုးရာဗုဒ္ဒဘာသာ ကိုတော့ခါ အတတ်နိုင်ဆုံး ထိမ်းသိမ်းနိုင်ကတ်တေ…….မဟိကေ ဟိစွာအကြောင်းပြုလို့ လှူကတ် တန်းကတ်စွာယာ….အဂုလေ့ ကလာဝ က ဦးမောင်သိန်း တေးခြင်းအသံ တညံညံ နန့် ၀ါကျွတ်လပြည် အလှူပွဲကြီးကို ဆင်နွဲဖို့ အားယူနိန်ကတ်တေ……….မအားရေ ကြားတိကလာပနာ လူတိ ၀ိုင်းဝန်းပြင်ဆင်ကတ်တေ……ဆီးမီး တစ်ထာင် ရွှာမှာ ပတ်ထွန်းဖို့ ၀ါးတိကို ခွပ်ပနာ ဆီစာတိနန့် ပတ်စိုက်ကတ်တေ……တရပွဲတိမှာ ဆင်ဖို့ ကြက်ချာတိ ကိုက်ကတ်တေ….ဆန်ရွီးကတ်တေ………ယင်းပိုင်နန့် ၀ါကျွန်လပြည့်ကိုရောက်ဖို့ တစ်ရက်နှစ်ရက်လိုရာ……………

`````````````````````````````````````````````````````````````

မိုးလင်းလို့ အိပ်ရာက ထ မျက်နှာသစ်လို့ အာကာကို မော်ကြည့်လိုက်စွာနန့် ရှစ်ခွင်ဝဠာရေ တစိချေလောက် မာယာများနိန်ရေလို့ ဖြူမချေ အဖ ရိပ်မိရေ….အာကာအရောင်ရေ အရောင်တိပြောင်းနိန်ရေ….လီရောင်တိ အ၀ါရောင်တိပိုင်….တစ်ခါတစ်လီ မိုးရိပ်တိ အုံ့ပနာ မိုးတိ အားနန့် တကြိုင်းကြိုင်ရွှာချရေ…….. လီလေ့ တစိချေ ပြင်းနိန်ပိုင်……. အိမ်ရှိက သရက်ကိုင်းတိနန့် အုန်းတိတစ်ချို့ ကြွီကျကတ်တေ………ယေဂေလေ့ မိုးနှောင်းကျဆိုကေ ဒေစွာတိ ရခိုင်ပြည်မှာ ဖြစ်နိန်ကျ…….

ည ၄ နာရီလောက်မှာ လီအဟုန်ရေ ကောင်းပြင်းပါလတ်တေ…..တဆီကျွီးငိုသံပိုင်..ပင်လယ်က လိုင်းတိလေ့ တ၀ုန်းဝုန်းနန့် ဆူနိန်ကတ်တေ………ဖြူမချေ အဖသည် စိတ်မှာ တစ်ခုခု ခုမိလာရေပိုင်………

“ ဟိုင်း အမိသယ်……..လီတိကောင်းပြင်းနိန်ရေ အချေတိကို အိမ်ပြင်မထွက်ခိုင်းကေ့ အထဲမှာ နိန်ခိုင်း….ငါ ရွှာထဲလားပနာ အခြေအနေ စုံစမ်းပိုက်ခီမေ…..” ယပိုင်ပြောပနာ ရွှာထဲထွက်ပါလတ်တေ…………….

“ အူး လီအကောင်းပြင်းမလားဂု ဒေနှစ်” ဆိုပနာ စိတ်မှာလေ့ ပြောမိသိမ့်ယင့် ။ ထုံးစိုင်အတိုင်း ရွှာလူကြီးအိမ်ဘက် ထွက်လာရေ…..ယေပြီးကေ အိမ်ထဲမှာ ထမင်းစားနိန်ရေ ဒါချေခိုင်အဖကို လှမ်းမိလိုက်တေ အချိန် ည ၅ နာရီ ခွဲဖို့ယာ…..

“ ယာ အကိုး ……ရေဒီယို နားမထောင်လာ ဇာသတင်းတိရလေ မုန်းတိုင်းလိုက်ဖို့လား မသိ..လီတိကောင်းပြင်းရေဂါ…….”
“ အေးကိုး ……ရေဒီယိုက တစ်ခုလေ့ မလားသိမ့်ကာ …ဒေနိန့် ရေဒီယိုလေ့ ခြတ်တတ်ခြတ်တတ်နန့် တစ်ခုလေ့ အလှက နားမလည်ပါ အကိုး……သာမာန်လီတိုက်စွာရာ ဟိဖို့အကို…..စိတ်မပူကေ့ အချေတိနန့် အိမ်ထဲမှာနိန်…..” ………… ငါ အစိုးရိမ်လွန်စွာယာဟိဖို့ဆိုပနာ ဖြူမချေ အဖ ပြန်တုတ်ပါလတ်တေ……… တစ်ရွှာလုံးလေ့ လီတိုက်သံ၊ အကိုင်းကျိုးသံတိနန့် ဆူလို့ ………


အိမ်ကိုရောက်လို့ ကကောင်းမကြာလိုက်……ရွှာထဲက ကုလားတိုက်ကျားဝင်ပိုင် အသံတိ ဆူညံပါလတ်တေ…...” ရီတက်လာရေ ပြီးကတ်၊ ပြီးကတ်ဆိုရေ အသံတိ ပဲ့တင်ထပ်နိန်ရေ….ယင်အချိန်မှာပင် လီရေ ကောင်းကြမ်းပါလတ်….ဖြူမချေရို့အိမ်ခေါင်းမိုးပွင့်ပါလားရေ…..။ အိမ်တစ်ခုလုံးလေ့ ကြဂြမ်းလှုပ်နိန်ရေ………..ဖြူမချေရို့ မောင်နှမတိ ကြောက်လို့ ငိုကတ်တေ….။ အဖသယ်အချိန်မှီရောက်လာလို့ကံကောင်း…….။

“ အမိသယ် အချေတိနန့် အယင်ထွက်ပါလတ်……..လီတိကြမ်းပနာ ရီတက်ပါလတ်ယာ….ရွှာကလူတိ အနောက်ဘက်က အမြင့်ဘက်ကို ပြီးနိန်ကတ်တေ……….၊”

တောင်မင်း မြောက်မင်းမကယ်နိုင် လူတိ အနောက်ဘက်ကို ဦးတည်ပြီးကတ်တေ…..လမ်းမှာပင် အပင်တိ ပိလို့ မပြီးနိုင်ရေ အဘိုးသျှင် အဘောင်သျှင် ရို့ အသက်သီကတ်တေ…….ငိုသံတိဆူပွတ်လာရေ…….ငါးဖမ်းဖို့ထွက်လားရေ အဘာရို့အတွက် တမ်းတလို့ ငိုကတ်တေ မိသားစုအသံတိ…..လီတိနန့် ပျောက်ကွယ်လားရေ ………

ဖြူမချေအဖ မောင်ချေ နှစ်ယောက်ကို ပက်ခုံးထက်ထမ်းပနာ အကိုင်ကျိူးတိ ရီထက်တိက တက်ပြီးရေ….ဖြူမချေက အမိသယ်လက်ကို ကိုင်ပနာ………မှောင်နိန်ရေ ရက်စက်ကြမ်းကြုတ်တေ ညထဲမှာ….မိုးထန်လီထန်ရေ အမှောင်ပိ ညထဲမှာ……ငိုသံတိနန့် ဆူပွတ်နိန်ရေ ဒေငရဲညထဲမှာ……..ဖြူမချေရို့မိသားစုရေ အသက်လှုးပြီးလာစွာ ၂ မိုင်လောက်ကျမှ ရီကလွတ်လားရေ…..ယေဂေလေ့ လီက ဆက်တိုက်နိန်ရေ……အမိုးအကာမဟိ……..ပြင်းထန်ရေး လီမုန်တိုင်းကြားမှာ အမိရင်ခွင်ထဲ မှေးစက်ရင်း ဖြူမချေ အိပ်ပါလားရေ…………….


ငှက်ချေ မြည်သံချေတိနန့် အရုပ်ဆိုးရေ ကမ္ဘာကြီးနိူးထလာရေ……..ညဇာက တစ်ခုလေ့ မဖြစ်ခပိုင်…..မသိကွန်ဆောင်နိန်ယင့်……..ဖြူမချေလေ့ ငှက်ချေရို့ မြည်သံတိနန့် နိုးထလာရေ……ကျွဲချေ၊ နွားချေ မြည်သံတိကြားရရေ….အချေပီပီ လူတိအများကြီနန့် ပျော်ကောင်းထမန်း………လူတိပါးစပ်ညက မုန်းတိုင်းလိုက်လို့ ပြီးရေ အကြောင်းရေ ပဲ့တင်ထပ်နိန်ရေ….ဇာတ်လိုက်မုန်တိုင်းက ပျန့်လခယာ……..ရွှာမှာ ဇာပိုင်ဟိလေမသိ………လူတိ အထုပ်ချေတိပိုးပနာ ရွှာကို တန်းစီ ပြန်လာကတ်တေ……..ရွှာကို အ၀င်မှာ လူတိ ရင်ဝတိ ဆို့ပါလားရေ…….ကိုယ့်ရွှာကိုတောင် မှန်းလို့မကျရေ အခြေအနေ……… ဟိသမျှ အပင်၊အိမ်တိ ပြဗြားဝတ်လို့ ……..အိမ်ခေါင်မိုး လှန်ကျန်လိုက်တေ ဖြူမချေ ၀ါးအိမ် အစအနပင်ရှာမတွိ …. လူတိရင်ဘတ်စည်တီးလို့ ငိုယိုကတ်တေ…….ကံကောင်းမကောင်းစွာနန့် အဖိုးဝါကြီး ၊ ၀ါကြီးမတစ်ချို့နန့် အချေ အစိတ်ကေ တစ်ချို့ သီကျလားရေ…..

ငိုနိန်စွာကဟုတ်ယာ အဂုလောလောဆယ် ဖြစ်နိန်ရေ ၀မ်းရီးကို ဇာပိုင်ချင်းဖို့လဲ၊ မြေပုံမြို့ထက်တက်ပနာ တောင်းဖို့လား……..မဖြစ်နိုင်……..မြေပုံလေ့ အားလုံး ကြင်းလားရေလတ် သတင်းတိကြားနိန်ရရေ……လောလောဆယ် ရွှာ အနောက်ဘက် တောင်အောက်က ဘုန်းကြီးကျောင်းက ကိုယ်တော်ရောက်လာပနာ အနိန်ကျဂေ ကျောင်းကို လိုက်လာကတ်ဖို့ ဆော်သြနိန်ရေ ……..လူတိလေ့ အိမ်ပြိုတိကြည့်ပနာ မျက်ရည်စက်လက်နန့် …………


ဖြူမချေရို့ သူငယ်ချင်းတစ်စု ရွှာအလယ်ဂေါင်ကို စကားချေတိပြောလို့ လျောက်လာကတ်တေ……..သူရို့ စာသင်ကျောင်းဘက်ကို ဦးတည်နိန်ကတ်တေ….

“ နာရို့ကျောင်းပြိုယခယာ အဆိုနိုင်” ဒါချေခိုင် စကားချေ မပီတပီနန့် ပြောနိန်ရေ……မြင်ကွင်းကမလှ……ဖြူမချေရို့ကျောင်း ရွှာလယ်ကောင်မှာ ပြဗြားဝပ်နိန်ရေ……..ထုပ်တိုင်ထက်မှာ သံဖြူတစ်ချပ်နှစ်ချပ် တင်ကျန်လိုက်တေ……..ကျောင်းရှိက ဖြူမချေရို့ ကစပ်ခစွာ နိန်ရာလေ့ အမှိုက်တိ အပင်၊ အကိုင်းကျိုးတိနန့် ထွီးလို့ပတ်လို့………..

ဖြူမချေ ဘော်ဒါ တစ်စူ ကျောင်းသံဖြူထက်မှာ တက်ရပ်ကတ်တေ…..ဖိနပ်ပနာ ခြီဗလာနန့် ……….ယပြီးဂေ အပူအပင်ကင်းရေ အချေတိသဘာဝ အတိုင်း တစ်ယောက်ခါးချေ တစ်ယောက် ဖက်ပနာ…….
“စွန်လာ သစ်ငုတ်လား၊ သစ်ငုတ်ဆိုထိုင်နိန်၊ စွန်ဆို ထလိုက်၊ ကြက်မမကောင်း ကြက်ချေကောင်း ပိယောင် ပိယောင်၊ ကြက်မ မကောင်း ကြက်ချေ ကောင်းပိယောင်၊ပိယောင်” ………….ကြက်မ မကောင်း ကြက်ချေ ကောင်း ပိယောင်…..ပိယောင်………ကြက်မ မကောင်း ကြက်ချေ ကောင်း ပိယောက်ပိယောင်………….


ဒေအော်သံချေ ကမ္ဘာက ကြားနိုင်ပါဖို့လားဂု ………………


( ဂီရိ မုန်တိုင်းကြားက အသံတိ ရခိုင်သွီးရင်းတိရင်ထဲ ရိုက်ခတ်နိုင်ပါစီ )



အေးမောင်(ရင်အုံတော်ဓာတ်)
၁၂၊၁၁၊၁၀၁၀( ၁၉း၄၄)

Read More...

Sunday 25 July 2010

စကားလုံးရို့နှင့်ဖိနှိပ်ခြင်း(၀ါ) ရခိုင့်လူအသိုင်းအ၀ိုင်းမှ အမျိုးသမီးရို့ဘ၀

(၁) အားကိုးရှာစွာရာမလား ။
(၂) နင့် ကို ငါ တတင့်တတယ်ထားနိုင်ရေ ။
(၃) ထိုကောင်မချေ ဆရာဝန်ချေ နန့် ရလားရေ....တစ်ဘ၀လုံးအီးချမ်းဖို့မလားရေ
(၄) ယင်းကောင်မချေ လင်သည် အိမ်ဂျိန်နီယာရေ.......
(၅) ဒေအကောင် မယားကိုလုပ်ကျွေးနိုင်ဖို့ကောင်ကမဟုတ် ။
(၆) ဟေး ....လင်ယူရေခါ ကို့ကို လုပ်ကျွေးနိုင်ဖို့ လူကို ရွီးယူရဖို့ ............

ဒေကမ္ဘာကြီးမှာ ဗုဒ္ဓမြတ်စွာဘုရားရေအမျိုးသမီးအခွင့်အရေးကို ပထမဆုံး အသိအမှတ်ပြုရေ မိတ္တာရှင်တစ်ယောက်ဖြစ်တေ။ ဇာကမ္ဘာက ဇာအကောင်ဇာပိုင်ဘင် အော်နီဘတ်ဇီ ဘုရားကို ဆရာလုပ်လို့မရ။ မြတ်စွာဘုရားရေ လူတစ်ယောက် အလားအလာဟိရေ ပင်ကိုယ်အရည်အချင်းတိကို ထိုးဖောက်မြင်နိုင်စွမ်းဟိရေ။ ကီသာဂေါတမီက ဘိက္ခုနီမ (ရဟန်းမ)

ဝတ်ခွင့်တောင်းရေခါ မြတ်ဘုရား လိုက်လျော့တော်မူရေ...ဒေချင့်ရေ ဘုရားသာသနာမှာ အမျိုးသမီးရပိုင်ခွင့်တိကို အသိအမှတ်ပြုခွင့်ပြုတော်မှုခြင်းဖြစ်တေ။ အလားအလာဟိရေ အရည်အချင်းတိကို လိုရာပန်းတိုင်ရောက်အောင် ထောင်ပံ့ကူညီခြင်းဖြစ်တေ...ဇာကောင်က ဇာပိုင် အမျိုးသမီးအခွင့်အရေး၊လူ့အခွင့်အရေး ဇာပိုင်ပင်ဖင်ခေါင်းကျယ်နိန်ဘတ်စီ ဘုရားလမ်းစိုင် သွေဖီလို့မရ...ဘုရားချတ်မှတ်ခရေ လမ်းစိုင်တိယာ............

ဒေနိန်ရာမှာ ဆက်ပြောရဖို့ဆိုကေ ထူးဆန်စွာတိလားတွိရေ၊ ဗုဒ္ဓဘာသာကို စန္ဒသူရိယမင်းလက်ထက်ကဘင်သက

်ဝင်ယုံကြည်ပါလတ်တေ ရခိုင်ပြည်မှာ အမျိုးသမီးတိရသင့်ရေ၊ ဖြစ်သင့်ရေ အခြေအနေတိ ရခိုင့်လူ့အသိုင်းအ၀န်းက ဖန်တီးမပီးနိုင်သိမ့်၊ ထောက်ပံ့မပီးနိုင်သိမ့်။ ရခိုင်အမျိုးသမီးတိ ကိုယ်တိုင်ကလေ့ လက်ဟိဖြစ်ပျက်နိန်ရေအခြေအနေအပေါ်မှာ ခြီနိန်ပုံပေါက်ကတ်တေ။ အထက်က အကျွန်ရွီးခရေ အက္ခရာ အစိုင်လိုက်စွာတိကို လေ့လာသုံးသပ်ဝေဖန်ကြည့်ကတ်ပါဖို့။

(၁) အားကိုးရှာစွာရာမလား ။

နားထောင်လို့ကောင်းရေ၊ သနားဖို့ကောင်းရေ၊ ချစ်ဖို့ကောင်းရေ အပြောချေတစ်မျိုးဖြစ်တေ၊ ယေဂေလေ့ ဒေစကားနောက်မှာ အကန့်အသတ်မိ စွမ်းအား(၀ါ) ဗီဇ တစ်ခုကို ပြောလိုက်တေ အမျိုးသမီးကိုယ်တိုင်က လက်မြှောက်အရှုံးပီလိုက်တေဆိုစွာ အရိပ်မကျလိုက်ကတ်။ ရခိုင်သမချေတစ်ယောက် မြန်မာချေ တစ်ယောက်နန့် ရလခရေခါ၊ တခြားလူမျိုးတစ်ယောက်နန့်ရလခရေခါ ထုံးစံအတိုင်းရခိုင်သားတိ အပြစ်တင်ကတ်တေ၊ ယင်းပိုင်ခါ မမချေရို့ပြန်ပြောရေ အားကိုးရှာစွာရာမလားလတ်၊ ရခိုင်သားအရက်သမားကိုယူဂေ ငါးပါးမှောက်ဖို့ပါလတ်၊ ဇာရခိုင်သမ ဇာနန့်ဘင်ရရ ၊ ယင်းချင့်ကို အကျွန်မဆိုလို၊ ယေဂေလေ့ အားကိုးရှာစွာမလားဆိုရေ စကားကို အကျွန် လားစိတ်ဝင်စားမိရေ၊ ဒေစကားလုံးရေ ရခိုင်၊ မြန်မာ လူ့အသိုင်းအ၀ိုင်းမှာ တွင်ကျယ်နိန်ရေ စွမ်းအားကြီးမားရေ စကားလုံးတစ်လုံးဖြစ်တေ၊ မမဆိုကေ အားကိုးရှာရဖို့ဆိုရေ အတွေးအခေါ်တစ်မျိုးကို သွီးထဲကို ဆီးထိုးပီးလိုက်စွာနန့်တူရေ၊ မိမိကိုယ်ကို အားကိုးမှု၊ မိမိ ခြီထောင်မိမိရပ်မှု၊ မိမိ ပင်ကိုယ်အရည်အချင်းကို ယုံးကြည်မှု၊ မိမိ ကိုယ်မိမိ လေ့လာသုံးသပ်နိုင်မှုဆိုရေ လူသားတစ်ယောက် ပင်ကုိယ်စွမ်းပကရို့ကို ဒေစကားလုံးက သံချီးစားလားရေ။ ဒေ အားကိုးရှာစွာရာမလားဆိုရေ စကားလုံးကို အခြေအနေအရ ရခိုင်ပြည်ထဲမှာ ဆဆင်းရရဲနန့် ဘ၀ ရုန်းကန်နိန်ရရေ ရခိုင်သမချေတစ်ယောက်က ပြောရေဆိုကေ တစိချေ သဟဇာတကျဖို့သိမ့်..ယေဂေလေ့ ဒေပိုင်စကားလုံးတိကို ယောင်္ကျားတိနန့်ရင်ဘောင်တန်းဖို့ကြိူးစားနိန်ကတ်တေ ရခိုင်သမတိပါ လက်ကိုင်ထားစွာရေ တစိချေ အံ့သြဖို့မကောင်းလား....

(၂) နင့် ကို ငါ တတင့်တတယ်ထားနိုင်ရေ ။

အလှပလ စိုင်းစားကြည့်ကေ ဒေအပြောရေ ကကောင်းရိုင်းစိုင်းရေ အပြောမျိုးလို့အကျွန်ထင်ရေ..ဒေချင့် အကျွန့်အထင်...စာဖတ်တေလူတိလေ့ ကိုယ်ထင်ချင်ပိုင်ထင်နိုင်ရေ။ ကိုင်...ဒေစကားလုံးကို လေ့လာသုံးသပ်ကြည့်ကတ်ပါဖို့....ဒေစကားရေ ယောင်္ကျားတိပြောဖြစ်တေစကားဖြစ်တေ....ကိုယ်ချစ်တေချစ်သူကိုဖြစ်ဇီ ကိုယ်လက်ထပ်ဖြစ်ဖို့ ရည်စူးထားရေ မမချေတစ်ယောက်ကို ယျောင်္ကျားတိကပြောရေ နင့်ကိုငါ တတင့်တတယ်ထားနိုင်ရေလတ်။ ဒေစကားရေ အပြောရလွယ်သလောက်ကကောင်း စွမ်းအားကြီးရေပိုင်..လဘားဝရေ အတွေးအခေါ်တိပါဝင်ရေ။ ရခိုင်လူမှုအသိုင်းအ၀ိုင်းမှာ အိမ်သျှင်မတိရေ အိမ်သျှင်တိနန့် ရင်ဘောင်တန်းပနာ ဘ၀ကို ရုန်းကန်ကတ်ရရေ။ ရခိုင်သမတိရေ တခြားကမ္ဘာက မမတိနိုင်းဆာဂေ ဘ၀ကို ပိုပြီးဂေ သတ္တိဟိဟိနန့် ရင်ဆိုင်နိုင်စွာတွိရရေ။ လင်သည်က ခရီးလားကေ မယားသည်က ငရုတ်ပင်ပျိုး၊ အချေတိက တစ်ဘက်နန့် အိမ်မှုကိစ္စအ၀၀ ကို ကျေပွန်အောင်ထမ်းဆောင်နိုင်ရေ သတ္တိဟိကတ်တေ။ ယေဂေလေ့ မမဆိုကေ အားနည်းသူ အားကိုးရှာရဖို့ တတင့်တတယ်ထားနိုင်ရေ ယောင်္ကျားရှာရဖို့ ဆိုရေ အတွေးအခေါ်တိဝင်လာအောင် ယင်းပိုင်စကားလုံးတိနန့် ဖိန်နှိပ်ခံနိန်ကတ်ရရေ။ ယင်းပိုင်ဖိနှိပ်ခြင်းတိရေ လူသားရို့ အကန့်အသတ်မဲ့ဖန်တီးနိုင်ရေ စွမ်းအားတိကို ဂြင်းကပ်စီရေ။ အမှန်ဆိုဂေ မမလေ့ အမိဝမ်းထဲမှာ သာမန်မျက်စိနန့်မမြင်ရေ ဆဲလ်တစ်ခုနန့်စလာရေပိုင် ယောင်္ကျားတိလေ့ ယင်းပိုင်စယင်းနန့်လူဖြစ်လာကတ်ရစွာ.......။.

ဖိုမ သဘာဝအရ အသွင်အပြင် အတွေးအခေါ် ပုံပန်းသဏ္တန် တစ်ိချေ ကွာခြားစွာကလွဲလို့ မမနန့် ယောင်္ကျားရေ ဖန်တီးနိုင်ဖို့စွမ်းအားကွာခြားခြင်းမဟိ။ ဇာလူက ဇာသူ့ကိုလေ့ တတင့်တတယ်ထားနိုင်စရာမလို.....ဗုဓ္ဒအတွေးအခေါ်အရ လင်ဝတ်၊မယားဝတ်ဟိသင့်စွာကိုအကျွန်လက်ခံရေ...သာယာချမ်းမြေ့ကြည်နှုးဖို့ကောင်းရေ အိမ်ထောင်မှုဘ၀တည်ဆောက်ဖို့အတွက် လင်ဝတ်မယားတိစွာ လိုက်နာသင့်ရေ လိုက်နာဖို့လိုအပ်တေအရာတိ ယေဂေလေ့ ဇာလင်ယျောင်္ကျားကမှ အိမ်သျှင်မကို တတယ်ထားနိုင်စရာမလို...ဒေစကားရေ သသမတ် အနိုင်ယူခြင်းတစ်မျုိးနန့်တူရေ....အ၀ီးကိုမကြည့်ခင် အကျွန့် ဘာဘာနန့်အမင်ကိုပြောပြမေ..အကျွန်ရို့တိ ကျွန်းမှာနိန်ရေလူတိ...ရခို်င်ပြည်စီးပွားရေအကြောင်းကိုအကျယ်ချဲမရွီးချင်ယာ..ရခိုင်ပြည်ရေ မြန်မာနိုင်ငံမှာ အဆင်းရဲဆုံးပြည်နယ်တစ်ခုဖြစ်တေ။ လက်တဆုပ်စာ လူတန်းစားတိကလွဲလို့ ၄ သန်းလောက်ဟိရေ ရခိုင်တိရေ အသက်တစ်ချောင်ရပ်တည်ရေ ဖြစ်တည်ပိုင်ရုန်းကန်နိန်ရရေ........အကျွန်ရို့ဘာဘာ မိုးခါ စပါးစိုက်တေ..ပွင့်လင့်ရာသီမှာ ခရီးလားရရေ တနားလေ့ အငြိမ်နိန်ဖို့မရ ယင်းပိုင် ဘာဘာ မဟိခါ အမင်တစ်ယောက် ဆောင်းရာသီ ငရုပ်ပင်စိုက် အိမ်က အချေတစ်ရွီကို ကျွေးမွေးပြုစု.....ချမ်းသာဂေလေ့ ချမ်းသာလျောက် ဆင်းရဲဂေလေ့ ဆင်းရဲရေအလျောက်ရခိုင်သမတိစွာ ပီးလာရေ တာဝန်ကို ကျွေပွန်အောင်ထမ်းဆောင်ကတ်တေ....ဒေကိစ္စမှာ အဘာကအမင်ကို တတင့်တတယ်နိန်ဇီချင်ဖို့ ယဂေလေ့ အဂွင့်လက်တွိကျလာရေခါ မမ ပါ ယောင်္ကျားပါ အိမ်ထောင်မှုတစ်ခု သာယာ အီးချမ်းအောင် တာဝန်ယူကတ်ရရေမလား....

(၃) ထိုကောင်မချေ ဆရာဝန်နန့်ရလာရေ..တသက်လုံးအီးချမ်းဖို့မလားယေ

(၄) ယင်းကောင်မချေ လင်သည် အိမ်ဂျိန်နီယာရေ


နံပါတ်စိုင်(၃) နန့် (၄) ကို တစ်ပေါင်တည်း လေ့လာသုံးသပ်ကြည့်ကတ်မေ၊ အကျွန်အထက်ကပြောခရေပိုင် မမချေဆိုဂေ အားကိုးရှာရဖို့ လင်သည်ဆရာဝန်၊ အိမ်ဂျိန်နီယာဆိုဂေ ဂုဏ်တင့်တယ်ရေ ယပိုင်အတွေးအခေါ်မျိုးတိ ရခိုင် အသိုင်းအ၀ိုင်းတိမှာ ရာစုနှစ်ဇာလောက်ထိ တွဲကတ်နိန်မေလေမသိ။ ဇာလူက စခါလေ မသိ နောက်ယိုင်ကျေးမှုတစ်မျိုးဟိသိမ့်ရေ ပညာတတ်၊ ဆရာဝန်၊ အိမ်ဂျိန်နီယာ၊ စစ်ဗိုလ်ဆိုရေ ရခိုင်တိကို ရခိုင်လူဂုဏ်တန်အသိုင်းအ၀ိုင်းတိက ဖဲသာပီးပနာဝယ်လတ်။ နှစ်ပေါင်း ၅၀၀၀ ကျော်ထိ Civilisation ဖြစ်ပါလတ်တေ ဒေလုမှုအသိုင်းအ၀ိုင်းမှာ ဒေပိုင်အတွေူးအခေါ်တိ ဆားငန်ဝင်နိန်စွာရှက်ဖို့ကောင်းရေ။ လူသားတစ်ယောက်ပင်ကိုယ်လက်ခံနိုင်လောက်တေ အမှုအကျင့်တိကို ဒေအသိုင်းအ၀ိုင်းတိကသစ္စာဖောက်ခြင်းဖြစ်တေ။ လူ့သဘ၀ ကို စိန်ခေါ်ခြင်းတစ်မျိုးဖြစ်တေ။ ထားလိုက်ကတ်မေ ခေါင်းစိုင်နန့် မအပ်စပ်လို့။ အထက်က စွာကို ဆက်ရဖို့ဆိုဂေ ရခိုင်ပြည်က ဆရာဝန်တိတော့ခါ သာမန်လူတန်းစားတစ်ယောက်ထက်အဆင်ပြေရေ၊ ဂုဏ်လေ့ ဟိရေဆိုစွာတော့ခါ လက်ခံနိုင်လောက်တေ ယေဂေလေ့ မမချေတစ်ယောက်ရေ အားကိုးရှာသင့်ရေ ဆိုရေ ဟခရီကျသီအိုရေ တစ်မျိုးနန့် ဆရာဝန်ကို လက်ထပ်ယူသင့်ရေဆိုရေ အတွေးအခေါ်မျိုးရေ မိမိကိုယ်ကိုယုံကြည့်မှုဆိုရေ မွီးရာပါလိုတရ လူသားစွမ်းအားတစ်ရပ်ကို သံချီးတက်ဇီရေ။ ဇာလူဇာဆရာဝန် အိမ်ဂျိန်နီယာ ဖြစ်ပတ်ဇီ လူသားတိုင်းမှာရေ ပင်ကိုယ်အရည်အချင်းစွမ်းအားတစ်မျိုးကိုယ်ဇီဟိကတ်တေ။ လင်ယူခါ ဆရာဝန်ကို ယူဖို့မှန်းဖို့အစား ငါဆရာ

ဝန်ဖြစ်အောင်လုပ်ဖို့ဆိုရေ ယုံကြည့်မှုစွမ်းအားတစ်မျိုးသွီးထဲထည့်ပီးသင့်ရေ

ဒေလောကမှာ အောင်မြင်မှုပါ ဆုံးရှုံးမှုပါ ယုံကြည်မှုနန့်စရေဆိုစွာကို ရခိုင်မျိုးဆက်သစ်တိ သဘောပေါက်သင့်ရေ။ တစ်ခုခုကို လုပ်နိုင်၊မလုပ်နိုင်လို့ ယုံကြည်မှုနှစ်ခုလုံး မှန်ရေ။ တစ်ခုခုကို မလုပ်နိုင်လို့ ယုံကြည်လိုက်စွာရေ ကိုယ်သွီးကြောကို ကိုယ်ပိတ်လိုက်စွာနန့်တူရေ။ အန်ထော်နီရိုဘိန်း(စ်) က ပြောဖူးရေ.... လူတိစွာလတ် ငပျင်ထွေတိမဟုတ်လတ် လူသားကိုယ်ဇီမှာ ပုန်းနိန် ငုံနိန် မြုံနိန်ရေ ပန်းတိုင်တိဟိရေလတ်၊ ယင်းပန်းတိုင်တိကရာ သူရို့ကို မလှုပ်နိုင်ကတ်ခြင်းဖြစ်တေလတ်။ ရခိုင်မသချေတိပထမဆုံးသိထားရဖို့စွာက လုပ်နိုင်စွာ အားလုံးကို အကန့်အသတ်မဲ့လုပ်နိုင်ခြင်းနန့် အကောင်းဆုံးမိတ္တူပွားနိုင်ခြင်းဆိုစွာတိဖြစ်တေ။ ရှိတ်စပီးယား စကားကို ဖောက်သည်ချရဖို့ဂေ အကျွန်ရို့ခန္ဒာကိုယ်စွာ အကျွန်ရို့ဥယာဉ်တိဖြစ်ပြီးကေ အကျွန်ရို့ စိတ်ဆိုစွာ အကျွန်ရို့ ဥယျာဉ်မှုးတိ ပါလတ်..........။

(၅) ဒေအကောင်မယားကိုလုပ်ကျွေးနိုင်ဖို့ကောင်ကမဟုတ်။

(၆) ဟေး ........လင်ယူရေခါ ကိုယ့်ကိုလုပ်ကျွေးနိုင်ဖို့လူကို ရွီးယူရဖို့။


ရခိုင်လူမျိုးဆိုဂေ ဒေစကားတိနန့်စိမ်းဖို့မဟုတ်။ အကျွန်ဆိုဂေ အချေကဘင်ကြားဖူးနိန်ကျ အကျွန်က ပပိန်ချေဖြစ်လို့အချေခါကပင် မယားလုပ်ကျွေးနိုင်ဖို့လူမဟုတ်လတ် ယပိုင်ကစပ်ခံဖူးရေ..အကျွန်လေ့ အချေဘာသာဘာဝ ပြန်ပြောဖူးရေ မယားလုပ်ကျွေးဖို့လူဖြစ်လာစွာမဟုတ်လို့........အချေဘာသာဘာဝအနိုင်လိုချင်ရေစိတ်နန့်ပြောမိခရေ စကားချေကို ပြန်သုံးသပ်မိဂေ မှန်ရေပိုင်တွိရေ....လင်လုပ်ကျွေးကိုမျော်ပနာ ခိုင်းစွာကိုရာလုပ်တတ်တေ မမမျိုးကိုလေ့ရှောင်သင့်ရေ။ မမချေတိလေ့ လင်လုပ်ကျွေးမှ အီးချမ်းဖို့ လုပ်ကျွေးနိုင်ဖို့လူကိုမှ ရွီးယူရဖို့ဆိုရေ ကြာအိုကျ အတွေးအခေါ်တိကို ခြီပြားသတ်သင့်ရေ။ ကမ္ဘာကို မကြည့်ဂေ့ ရခိုင်ပြည်အနီးတ၀ှိက်ကိုကြည့်.။ အာသျှတိုက်နိုင်ငံသမ္မတတိမှာ အမျိုးသမီးတိ အများကြီးပါဝင်လာရေ...နိုင်ငံတကာက သမ္မတအကြံပီးတိ၊ နိုင်ငံခြားရေးရာဝန်ကြီးတိ၊ လှုံခြုံရေအကြံပီးဝန်ကြီးတိ၊ တော်လှန်ရေးသမား၊အတွေးအခေါ်သမားအဆုံး အမျိုးသမီးတိ ထိပ်ဆုံးကပါဝင်လာရေ...။ရခိုင်သမတိနိုင်ငံသမ္မဖြစ်ရဖို့ပြောနိန်စွာမဟုတ်။ ရခိုင်ပြည်မှာ ဟိရေ ရခိုင်သမတိစွာ တခြားနိုင်ငံက အမျိုးသမီးသမ္မတ ထိထက် တာဝန်တိများကတ်တေ.....ယင်းချင့်ကို အကျွန်နားလည်ရေ..ယေဂေလေ့ ရခိုင်အသိုင်းအ၀ိုင်းတိ ထဲမှာ စကားလုံးတိနန့်ဖိနှိပ်မခံရဖို့အကျွန်အကြုံပြုနိန်ခြင်ဖြစ်တေ။ သားကိုသခင် လင်ကိုဘုရားဆိုရေ ဟခရီ စကားပုံတိကို ရခိုင်သမတိစွဲကိုင်ထားဖို့မလို...အကျွန်အချေခါ အမင်က ထဘီရုပ်ခိုင်းရေ အကျွန်ကပြောရေ မရုပ်နိုင် နိတ်လတ်မေကြောက်တေလို့ ယေခါအဘောင်သျှင် နင်ဇာအခေါင်းကထွက်လာစွာလေလတ်...အဘောင်သျှင်ပြောစွာ အလှပလမှန်ရေ...

လျှာတစ်ချောင်းရေ အရာရာ အမျိုးမျိုးကို ဖန်တီးနိုင်ရေ၊ ငြိမ်းချမ်းရေကမ်းလှမ်းရေလေ့ လျှာဖြစ်တေပိုင်၊ စိန်ခေါ်စွာလေ့ လျှာဖြစ်တေ၊ ချစ်စကားဆိုဂေလေ့ ဒေလျှာ အမုန်းစကားဆိုဂေလေ့ ဒေလျှာ၊ လျှာကြောင်းဖြစ်လာရေ အသံရေ လူ့အတွင်းစိတ်၊ အတွင်းရုပ်ကိုထင်ဟပ်စီနိုင်ရေ။ ယင်းပိုင်ဆိုကေ အဂုလက်ဟိပြောဆိုသုံးနှုန်းနိန်ကတ်တေ အကျွန်ရို့အသိုင်းအ၀ိုင်းကစကားလုံးတိစွာ ကိုယ်ရို့အမျိုးသမီးထုကို ဖိနှိပ်နိန်ခြင်းလားလို့ အကျွန်မီးခွန်းထုတ်ချင်လာရေ။ ယင်းပိုင်စကားလုံးတိနန့် သွန်သင်သည်ဖြစ်စီ၊ယိုင်ကျေးမှု၊ လူဘောင်တန်ဖိုးတစ်ခုအနိန်နန့် ကျင့်သုံးသည်ဖြစ်စီ လူ့သားတစ်ဦးတစ်ယောက်အတွက်အကျိုးမဟိရေ ဆားမရ ရီမရ အပြောအဆိုအသုံးအနှုန်းတိကို အကျွန်ရို့ လေးဘက်လေးစိက သုံးသပ်ဖို့အချိန်ကျဗျာယ်ကြောင်းအကျွန်ရွီးသားတင်ပြလိုက်ပါရေ။



မှတ်ချက်။......။ အကျွန်ရေ ၀ါသနာသျှင်စာရွီးရေလူတစ်ယောက်ဖြစ်ပါရေ။ မှန်မမှန်ပပွင့်လလင့်ဝေဖန်ဆွေးနွေးနိုင်ပါရေ။ လိုနိန်စွာတိဟိကေလေ့ ဝေဖန်အကြုံပြုကတ်ပါရန်တောင်းခံအပ်ပါရေ။ လိုရာပန်းတိုင်ကိုရောက်နိုင်ကတ်ဇီ။



အေးမောင်(ရင်အုံတော်ဓာတ်)
၂၀ ဇူလိုင် ၂၀၁၀(၀၉း၂၂)

Read More...

Thursday 6 May 2010

ကြယ်ရို့ ဟာမိုနီ

ကြယ်ရို့ ဟာမိုနီ
………………………..

အမြင့်ဆုံး အကာထက်မှာ
ကြယ်စင်တိဝန်းရံလို့

အဆုံးမဟိရေ……………
အချစ်ဝိညဉ်
အဆုံးမဟိရေ…………
ငါ့ ၀ိညဉ်

အချစ်ဂီတရို့
ဖန်ဆင်းသျှင် အို သခင်

ပျော်ရွှင်မှုရို့ အမြင့်မြတ်ဆုံး
တောင်းတမှု ညို့အားတိ
ငါ့ ကို ခဗြားလာသတ်………

ငါ့ဘ၀ တစ်စိတ်တစ်ဒေသ အကွေ့မှာ
အချစ်ကြယ်စင်ရို့ ဖန်တီးသူ အို သခင်……

ပန်းဆိုဂေ မြီမှာခ
စမ်းဆိုဂေ နွီမှာခန်း
အလွမ်းပန်း တစ်သန်း
ခမ်းခြောက် အနမ်း ……………။

ထီးနန်းစံ အချစ်ဗိမာန်
မိတ္တာစိတ်မှန် ငါ့နှလုံးသားအလံ
အမှန်စိုက် ဖို့ ငါတာစူးပြန်

အို………ကြယ်စင်ရို့ ဟာမိုနီ

အသျှင့် နှလုံးသား
အချစ်ကြယ်စင်ရို့
အယင် ထွန်းလင်းကတ်ပါ ဖိ………..။

အေးမောင်(ရင်အုံတော်ဓာတ်)
၀၄၊၀၅၊၂၀၁၀( ၁၆း၄၇)

Read More...

အင်ဂရား သခင်မ

အင်ဂရား သခင်မ
........................

လရို့ သာခေါင်
တပေါင်း နွီဦး
ဝါးငှက်ချေ တွန်သံကျူးလို့ ........

ကြွီကျ ငါအသဲ
ရွှက်ခြောက်တိပိုင်
တဖြုတ်ဖြုတ်နန့်

သခင်မ ခြီအပါးခရသည်။

သခင်မ လားရာ
တလျောက်လမ်းဝယ်
ပန်းမျိုးတစ်ရာ
သက်ဆင်းကြွီလို့

ငှက်မျိုးမောင်နှံ
သံပြိုင်ဆိုလျက်

တေးခြင်းသီကုံး ဆိုကတ်သည်.....။

အင်ဂရားသခင်
အို အသျှင်မ

တစ်သက်တစ်ခါ
ချစ်မိဒေလူ
ဒေ ငမိုက်အား....

အသျှင်မ၏ အင်ဂရားပန်တိနန့်
ပစ်လျက်
ချစ်ကြိမ်လုံးနန့်
ဆုံးမတော်မှုပါ..........။

(အသက်နန့်ထပ်တူချစ်ရသူ အင်ဂရားပန်းချေသို့)

အေးမောင်(ရင်အုံတော်ဓာတ်)
(၀၃၊၀၃၊၂၀၁၀) (၂၃း၁၂)

Read More...